寶珮如毀容

寶珮如毀容

寶珮如毀容後曾欲尋死

藝人寶珮如為節目《食德好．嚴浩偏方》擔任嘉賓，她坦言早年因車禍導致毀容後曾欲尋死，幸得好友在經濟上支持她，令她得以重新振作。

寶珮如毀容

苦過樂透 寶珮如

天災人禍帶給人類的侵略性與破壞性，在這兩個星期裏相信大家深深體會得到，更甚者是了解到人的身體是何等脆弱，脆弱程度可以說是任憑你如何掙扎求存也挽救不了。

命運？

的確，在人類的世界裏面，有人永遠深信命運主宰人生。

一九九九年十一月十日，前亞視藝員寶珮如 (Baby) 在與男朋友駕車回家途中，在距離不足一個街口的小徑意外失事，從此燦爛人生頓成人間煉獄。

毀容帶給 Baby 的震撼不止於外表，心靈的創傷與事業的轉變，一下子委實難以接受。

所以三年的康復期正正是她的災難期，自閉到抑鬱，抑鬱到自毀，直到兩年前憑宗教信念重生，最近她將自己經歷寫成自傳《一張寶貝的笑臉》。她選擇挑戰命運︰「曾經我埋怨主，但依家我感激主帶俾我考驗。」

自我安慰？說的也是，始終人要再次站起來亦得靠本身意志，若然主真的能帶給 Baby 脫離苦海，但願可以對南亞災民多點仁慈吧！

寶珮如不是大明星，知名度並不高，十多年前，她抱玩玩的心態參加亞視舉辦的「第三屆未來偶像爭霸戰」，一九八九年她推出首張大碟《飛》及《請先掛號》，之後在90年加入亞視，成為藝員。一切看似順風順水的事業令她對身邊事物不在乎，不懂得珍惜，更遑論想過不幸竟纏繞自己一生。

寶珮如毀容

床上烙印

九九年發生車禍，一切都變得好突然，最嚴重的創傷是毀容，盤骨移位，令我行唔到，康復期內我的大部分時間都在醫院病床渡過。

呢五年間，各大小手術我經歷過十幾次，面骨碎裂，以致永久性將鈦金屬片放在面內固定位置，後果屬未知數，車禍令我嘴唇爆開，上齶牙骨碎裂，唔能夠進食，連飲水都唔可以，只靠喉管帶俾我流質食物，當時令我最深感受的是原來以往一直忽視，別人以為最基本的食飯對於我呢個病人來說是如此困難。我有埋怨，有後悔，為何以前唔珍惜身邊一切，當時知道毀容喇！以後點呢？

接頭三年，醫生一次又一次的替我做手術，我雖然痛苦，但仍然撐落去。嘴部最嚴重，由耳仔植皮，令人中位好似生舊肉出來，非常核突，最近一次手術是去年十一月，現在總算滿意。

由原本一位藝人，到破相，在擔心銀色旅途完結的同時，更要面對生活難關，龐大的醫療費用加上基本開支，令一位鏡頭前經常活潑可愛的 Baby 也要低頭，含已經哭不完的淚水向身邊朋友借錢，換來的是現實的答案，可幸的是仍然有一班真正朋友伸出溫暖的手。

心力交瘁

當時長醫院，生活好艱難，零收入令我呢個由細到大都好倔強的人都要屈服，向朋友借錢。但開口如吞三呎劍，我喊住問我身邊朋友︰「我冇錢，要做手術，要食飯，你可唔可以借錢俾我。」我連僅有自尊也放低。

此時，我認清何謂「朋友」，並唔係昔日與你風花雪月就等如朋友，有的說借但唔借，我唔會怨，始終長貧難顧，但好彩一樣有真正朋友，袁潔儀就是其一，一句「我有飯食，你就有飯食」令我感到人間還有情。

我並唔希望大家只對我同情，所以當時我經常去「當舖」，將僅餘首飾變賣，四十歲人都未試過如此過活，劇變令我抑鬱，頭三年我足不出戶，試過落街行過衫舖，我心想︰「我好想買衫！」可惜當我拎起件衫照鏡時，我發覺我的容貌破壞件衫，心情的悲痛難以形容。

Baby 事發時與現任男友小強一起，這個由相識到意外只有六個月的小強，就是令 Baby 一生轉變的男人，亦是令 Baby放棄與相戀十五年的駱達華中間的第三者。意外後，Baby與小強的人生猶如坐過山車一樣，兩人關係開始動搖，劇痛更令Baby決定了結餘生，但試死過後的Baby 卻能夠重生。

絕境逢生

兩人一齊撞車，偏偏最傷的只有我，我自信心消失，每天起身第一件事就是喊，加上枕邊人生意失敗，染上賭癮，生活壓力百上加斤。曾經佢「放棄」過我，每日早出夜歸，在我最需要照顧的日子佢選擇逃避。

出院、覆診甚至起居飲食都由我呢個病人搞掂，我痛、我辛苦只得我去受，所以兩年幾前我Book一間酒店房，狂吞廿幾粒安眠藥自殺，希望主唔好再次叫醒我。不過我死唔去，第二朝醒番諗好耐，我要積極、堅持，之後心態開始轉變，我學識包容，慢慢男朋友亦被我感動，慚愧令我關係重修舊好，昔日自怨自艾的 Baby亦過去，當中主俾我的信念是我重生的根源。

呢一年多我籌備出書，描述自己經歷，並唔係博同情，而係希望藉此向身邊朋友道謝，從而帶俾一些不幸人重生的信念。

從容

訪問前，記者欣賞過寶珮如的著作《一張寶貝的笑臉》，從沒有經歷的讀者看上去，可能只是單純的「慘」，並冇深層的體會，當然這是人之常情，試問世上有多少人會居安思危呢？

世事難料，外貌是與生俱來，命運也是由天註定，Baby捱過五年的痛苦後重生，回歸社會，她渴望繼續演藝夢︰「我想證明自己重可以工作，觀眾接受唔到我外表咩？做幕後囉！我重有把聲。」

堅定的信念令昔日Baby那開心笑臉重現，容毀了，但心不毀。今日的她外貌上的確有缺憾，但久經折磨後能重新振作，你能做到嗎？